RSS

Daily Archives: October 7, 2013

AP – SET కార్యదర్శి ప్రొఫెసర్ రాజేశ్వరరెడ్డితో


బహుళ ప్రయోజనాల ఏపీసెట్!

రాష్ట్రంలో డిగ్రీ కళాశాలల అధ్యాపక నియామకాలు, జూనియర్ లెక్చరర్ల పదోన్నతులు, విశ్వవిద్యాలయాల్లో సహాయ అధ్యాపక పోస్టులు తదితర నియామకాల్లో ఏపీసెట్ అర్హత తప్పనిసరి. యూజీసీ నెట్ తర్వాత అత్యంత ప్రాధాన్యమున్న ఆంధ్రప్రదేశ్ స్టేట్ ఎలిజిబిలిటీ టెస్టు (ఏపీసెట్)కు రోజురోజుకూ ఆదరణ పెరుగుతోంది. 14 ఏళ్ల తర్వాత ఏపీసెట్ నిర్వహణకు ప్రభుత్వం 2012లో అనుమతినివ్వగా, గత ఏడాది ఓయూ ప్రవేశ పరీక్షను విజయవంతంగా నిర్వహించింది.

ఈ నేపథ్యంలో ఏపీసెట్ సభ్య కార్యదర్శి ప్రొఫెసర్ రాజేశ్వరరెడ్డితో ‘న్యూస్‌టుడే’ ముఖాముఖి నిర్వహించింది. ఆ వివరాలు…
న్యూస్‌టుడే: ఏపీసెట్‌కు ఇప్పటి వరకూ ఎన్ని దరఖాస్తులు వచ్చాయి? కిందటేడాది ఎంతమంది దరఖాస్తు చేసుకున్నారు?

సెట్ సభ్య కార్యదర్శి: గత ఏడాది 24 విభాగాలకు పరీక్షలు నిర్వహించాం. వాటికి 1,17,795 మంది దరఖాస్తు చేసుకున్నారు. ఈసారి మొత్తం 27 విభాగాలకు పరీక్షలు నిర్వహిస్తున్నాం. వీటికి 1,25,000 నుంచి 1,30,000 వరకు రావచ్చని అంచనా వేస్తున్నాం.
మూడేళ్లపాటు ఏపీసెట్ నిర్వహించడానికి ఓయూకు అనుమతి వచ్చింది కదా! ఇక మీదట ఏటా ఈ పరీక్ష నిర్వహిస్తారా?

ఏపీసెట్ పరీక్ష నిర్వహణకు ఓయూకు మూడేళ్ల అనుమతి లభించింది. ఏడాదికి ఒకసారి చొప్పున వరుసగా మూడేళ్ల పాటు నిర్వహిస్తాం. యూనివర్సిటీ గ్రాంట్స్ కమిషన్ (యూజీసీ) నిర్ణయాలకనుగుణంగా ప్రవేశ పరీక్ష ఉంటుంది.
1998 తర్వాత 2012లోనే ఏపీసెట్ నిర్వహించారు? 14 ఏళ్లపాటు నిర్వహించకుండా ఒక్కసారిగా ఏటా నిర్వహించడానికి నిర్ణయం తీసుకోవడం వెనుక ప్రత్యేక కారణాలేవైనా ఉన్నాయా?
యూజీసీనెట్ జాతీయస్థాయి పరీక్ష కావడం, ప్రాంతీయ భాషలకు చెందిన విద్యార్థులు నష్టపోకూడదనే ఉద్దేశంతో ఏపీసెట్‌ను తప్పనిసరి చేశారు. ప్రస్తుతం రాష్ట్రంలో విద్యా ప్రమాణాలను పెంచడంలో భాగంగా యూజీసీ నిబంధనలకు అనుగుణంగా ఏపీసెట్ నిర్వహిస్తున్నాం. అంతే కాకుండా రాష్ట్రంలో భర్తీ చేయాల్సిన ఖాళీలు అధికంగా ఉండటం లాంటి అంశాలను దృష్టిలో పెట్టుకొని ఈ నిర్ణయం తీసుకున్నారు. గత ఏడాది ఏపీసెట్‌ను సమర్థంగా నిర్వహించడం కూడా అనుమతి ఇవ్వడానికి మరో కారణం.
ఏపీసెట్ నిర్వహణ బాధ్యతలను ఓయూ ఎలా దక్కించుకోగలిగింది?

ఏపీసెట్ నిర్వహణకు సంబంధించి ప్రభుత్వం ముగ్గురు సభ్యులతో కూడిన కమిటీ వేసింది. ఈ కమిటీలో ఓయూ నుంచి నేను, ఆంధ్ర విశ్వవిద్యాలయం నుంచి విజయ్ ప్రకాశ్, కాలేజీయేట్ కమిషన్ అధికారి విజయ్‌కుమార్ సభ్యులుగా ఉన్నాం. మహారాష్ట్ర, కర్ణాటక, తమిళనాడు రాష్ట్రాల్లో పర్యటించి అక్కడి సెట్ల విధానాన్ని తెలుసుకున్నాం. ప్రభుత్వానికి కొన్ని ప్రతిపాదనలు చేశాం. 2011 అక్టోబరులో నివేదిక అందజేశాం. ఓయూకు ఉన్న గుర్తింపు, పనితీరు తదితర అంశాల వల్ల ఏపీసెట్ నిర్వహణ బాధ్యత ఓయూకు దక్కింది. 2011 డిసెంబర్ 11న ఓయూకు అనుమతిస్తూ ఆదేశాలిచ్చారు. అన్ని అనుమతులు పొందిన తర్వాత 2012 మార్చి 3న ఇక్కడ ఏపీసెట్‌కు ప్రత్యేక కార్యాలయాన్ని ప్రారంభించాం.
ఈ ఏడాది (2013) కొత్తగా అవకాశం కల్పించిన విభాగాలేవి?

లింగ్విస్టిక్, ఆంత్రోపాలజి విభాగాలను ఎందుకు తొలగించారు? ఏపీసెట్-2013లో కొత్తగా జర్నలిజం, లైబ్రరీసైన్స్, సంస్కృతం, సోషల్‌వర్క్, జాగ్రఫీ విభాగాలకు అనుమతి లభించింది. 30 విభాగాలకు అనుమతి కోరగా, యూజీసీ 27 విభాగాలకు అనుమతినిచ్చింది. గతంలో 24 విభాగాలుండేవి. దరఖాస్తులు తక్కువగా రావడం, ప్రభుత్వం భర్తీ చేసే ఖాళీల సంఖ్య తక్కువగా ఉండటంతో ఆంత్రోపాలజి, లింగ్విస్టిక్ విభాగాలను తొలగించారు. ఖాళీల సంఖ్య కనీసం 10 ఉన్నప్పుడే ప్రభుత్వం నుంచి అనుమతి లభిస్తుంది.
ఏపీసెట్‌లో మరిన్ని విభాగాలు ప్రవేశపెట్టే అవకాశముందా?

సంబంధిత విభాగాల్లో డిమాండ్ ఆధారంగా యూజీసీ, ప్రభుత్వం నుంచి అనుమతి లభిస్తే పెరిగే అవకాశం ఉంది. కర్ణాటకలో 32 విభాగాలకు పరీక్షలు జరుగుతున్నాయి. ఆయా రాష్ట్రాల్లోని కోర్సుల ఆధారంగా అనుమతులు లభిస్తాయి.
యూజీసీనెట్, సీఎస్ఐఆర్‌నెట్ పరీక్షలతో ఏపీసెట్‌కు ఉన్న ప్రధాన తేడాలు, పోలికలు ఏమిటి?

యూజీసీనెట్, సీఎస్ఐఆర్‌నెట్ పరీక్షలను జాతీయస్థాయిలో నిర్వహిస్తారు. దీంట్లో కొన్ని విభాగాలవారికి ప్రాంతీయ భాషల్లో చదవడానికి అవకాశం ఉండదు. ఏపీసెట్ ద్వారా ప్రాంతీయ భాషల్లో రాసుకోవడానికి అవకాశం ఉంది. యూజీసీనెట్ అర్హత సాధించినవారికి జాతీయస్థాయిలో అవకాశాలు ఉంటాయి. ఏపీసెట్ రాష్ట్రానికే పరిమితం.
యూజీసీనెట్ పరీక్షలా ఏపీసెట్‌ను ఏడాదికి రెండుసార్లు నిర్వహించే ఆలోచనా ఏమైనా ఉందా?

యూజీసీ నిబంధనల ఆధారంగా పరీక్షలు ఉంటాయి. మనరాష్ట్రం నుంచి చాలామంది అభ్యర్థులు నెట్, సెట్ పరీక్షలను కూడా రాస్తారు. అందువల్ల ప్రస్తుతానికి ఏపీసెట్‌ను ఏడాదికి ఒకసారే నిర్వహించాలని నిర్ణయించాం. గతంలో ఏపీసెట్‌ను ఏడాదికి రెండు పర్యాయాలు నిర్వహించేవారు. ఇతర రాష్ట్రాల్లోనూ ఇలాంటి పరీక్షను ఏడాదిలో ఒకేసారి నిర్వహిస్తున్నారు. ఇకమీదట ఏపీసెట్ ఏటా క్రమం తప్పకుండా ఉంటుంది కాబట్టి అభ్యర్థులకు అవకాశాలు మెరుగ్గానే ఉంటాయి.

ఏపీసెట్ ద్వారా అభ్యర్థులకు కలిగే ప్రయోజనాలేమిటి?

ఏపీసెట్ ద్వారా అభ్యర్థులకు బహుళ ప్రయోజనాలున్నాయి. డిగ్రీ అధ్యాపక ఉద్యోగాలు, విశ్వవిద్యాలయ సహాయ అధ్యాపక పోస్టులు, జూనియర్ లెక్చరర్ల పదోన్నతులు తదితర అంశాల్లో అదనపు అర్హతగా ఉంటుంది. విద్యాసంస్థల్లో ఫెలోషిప్‌లు పొందడానికి అదనపు అర్హతగా ఉపయోగపడుతుంది. దీని ద్వారా ఉద్యోగ అవకాశాలతోపాటు పదోన్నతులు కూడా లభిస్తాయి. అంతేకాకుండా కళాశాలల్లో అధ్యాపకుల బోధనా సామర్థ్యం కూడా పెరుగుతోంది.
జూనియర్ కళాశాలల అధ్యాపకుల ఎంపిక విషయంలోనూ ఏపీసెట్ అర్హతను పరిగణనలోకి తీసుకునే ఆలోచనలు చేస్తున్నట్లు సమాచారముంది. దీనికి సంబంధించిన వివరాలు తెలపండి.
రాష్ట్రంలో జూనియర్ లెక్చరర్లకు బోధన అర్హతగా ఒక నిర్దిష్ట ప్రమాణం ఉండేవిధంగా ఏపీసెట్‌ను తప్పనిసరి చేయాలనే అంశంపై చర్చలు జరుగుతున్నమాట నిజమే. దీని సాధ్యాసాధ్యాలను పరిశీలించిన తర్వాత ప్రభుత్వం తుది నిర్ణయం తీసుకుంటుంది. ప్రతి ఉద్యోగ నియామకానికీ ఏదో ఒక అర్హతను తప్పనిసరి చేయనున్నారు. కాబట్టి భవిష్యత్తులో జూనియర్ కళాశాలల అధ్యాపకుల ఎంపిక విషయంలోనూ ఏపీసెట్ అర్హతను పరిగణనలోకి తీసుకునే అవకాశముంది.
అభ్యర్థులకు మీరిచ్చే సూచనలేమిటి?

అభ్యర్థులు పరీక్షకు దరఖాస్తు చేసుకోవడం నుంచే అప్రమత్తంగా ఉండాలి. పూర్తి చేసిన దరఖాస్తులను ఒకటికి రెండుసార్లు పరిశీలించిన తర్వాతే అధికారులకు అందజేయాలి. పొరపాట్లు దొర్లకుండా చూసుకోవాలి. రిజిస్ట్రేషన్ చేసుకునేప్పుడు, ఫొటోలు అప్‌లోడ్ చేసేటప్పుడు కొంతమంది అభ్యర్థులు ఒకేసారిగా అంతర్జాలంలో వెంటవెంటనే పూర్తి చేస్తారు. ఒకరి రిజిస్ట్రేషన్ పూర్తయ్యాక, లాగవుట్ చేసిన తర్వాతే మరో వ్యక్తి రిజిస్ట్రేషన్‌ను ప్రారంభించాలి. లేకపోతే ఒకరి దరఖాస్తుల్లో మరొకరి ఫొటో రావచ్చు. రిజిస్ట్రేషన్ పూర్తయిన తర్వాత దరఖాస్తును ప్రింట్ తీసుకొని ఏపీసెట్ కార్యాలయంలో అందజేయాలి. కొంతమంది ఇవ్వడంలేదు. వీరికి సమస్యలు తప్పవు.
పరీక్షకు సంబంధించి అభ్యర్థులు అకడమిక్ పుస్తకాలను క్షుణ్ణంగా చదవాలి. కావాల్సిన పుస్తకాలను ముందుగానే సమకూర్చుకొని, సొంతంగా నోట్సు ప్రిపేర్ చేసుకోవడం ఉత్తమం. ఇప్పటి నుంచే రోజులో కనీసం 8 గంటలైనా చదవాలి. ప్రణాళికలేని చదువు వృథా. ప్రశ్నను క్షుణ్ణంగా చదివి, పూర్తిగా అర్థం చేసుకున్నాకే సమాధానం రాయాలి. బాల్‌పాయింట్ పెన్‌తో రాయాలి కాబట్టి కచ్చితంగా నిర్ధరించుకున్నాకే సమాధానాలు గుర్తించాలి. మూడో పేపర్ కాస్త కఠినంగా ఉంటుంది. అన్ని పేపర్లలో క్వాలిఫై కావాలి కాబట్టి సమ ప్రాధాన్యమిచ్చి చదవాలి. దేన్నీ నిర్లక్ష్యం చేయకూడదు.
పరీక్ష విధానం గురించి చెప్పండి

. ఏపీసెట్ పరీక్ష రెండు భాషల్లో ఉంటుంది. తెలుగు, ఆంగ్ల భాషల్లో పరీక్ష పత్రం ఉంటుంది. కొన్ని విభాగాలకు మాత్రమే తెలుగులో రాసుకునే అవకాశం ఉంది. 27 విభాగాల్లో 8 విభాగాలకు తెలుగు మాధ్యమంలో పరీక్షలు రాయవచ్చు. అవి: ప్రభుత్వపాలనశాస్త్రం, రాజనీతిశాస్త్రం, ఆర్థికశాస్త్రం, కామర్స్, ఎడ్యుకేషన్, చరిత్ర, సమాజశాస్త్రం, సోషల్‌వర్క్. మిగతావాటిని ఆంగ్లంలో రాయాలి. అభ్యర్థులు మూడు పేపర్లు రాయాల్సి ఉంటుంది. ఇవి మల్టిపుల్ ఛాయిస్ ఆబ్జెక్టివ్ తరహాలో ఉంటాయి. మొదటి పేపర్ అందరికీ ఒకటే. రెండు, మూడు పేపర్లు ఆయా విభాగాలకు సంబంధించి ఉంటాయి. మొదటి పేపర్‌లో మొత్తం 60 ప్రశ్నలు ఉంటాయి. వీటిలో 50 ప్రశ్నలకు మాత్రమే సమాధానాలు గుర్తించాలి. 50 కంటే ఎక్కువ ప్రశ్నలకు జవాబులు గుర్తిస్తే మొదటి 50 ప్రశ్నలకు ఇచ్చిన సమాధానాలనే పరిగణనలోకి తీసుకుంటారు. దీంట్లో టీచింగ్ అండ్ ఆప్టిట్యూడ్‌పైనే ప్రశ్నలు వస్తాయి. ఒక్కో ప్రశ్నకు రెండు మార్కుల చొప్పున 100 మార్కులు ఉంటాయి. సమయం 75 నిమిషాలు. రెండో పేపర్‌లో 50 ప్రశ్నలు ఉంటాయి. ప్రతి ప్రశ్నకు రెండు మార్కులు. సమయం 75 నిమిషాలు. మూడో పేపర్‌లో 75 ప్రశ్నలుంటాయి. ఒక్కో ప్రశ్నకు రెండు మార్కులుంటాయి. పరీక్ష సమయం రెండున్నర గంటలు. మొదటి రెండు పేపర్లలో అర్హత సాధిస్తేనే మూడో పేపర్‌ను మూల్యాంకనం చేస్తారు.

Advertisements
 
Comments Off on AP – SET కార్యదర్శి ప్రొఫెసర్ రాజేశ్వరరెడ్డితో

Posted by on October 7, 2013 in Uncategorized

 
 
%d bloggers like this: