RSS

పాఠశాల విద్యార్థుల ప్రవేశాలకు ఇంటర్వ్యూలొద్దు

22 Oct

 

*హెచ్చరించినహైకోర్టు

 

ముంబయి, న్యూస్‌టుడే: ఎనిమిదో తరగతి వరకు విద్యార్థులకు పాఠశాలలో ప్రవేశం కల్పించేందుకు ఎలాంటి ఇంటర్వ్యూలు నిర్వహించకూడదని బాంబే హైకోర్టు కీలక తీర్పును వెలువరించింది. ఇంటర్వ్యూల నిర్వహణ చట్టవిరుద్ధమని, అది ‘విద్యాహక్కు’ చట్టానికి వ్యతిరేకంగా ఉందని తేల్చి చెప్పింది. న్యాయమూర్తులు అభయ్ ఓకే, రేవతి ధొరేతో కూడిన ధర్మాసనం అక్టోబరు 21న (సోమవారం) ఈ తీర్పు ఇచ్చింది. ఇంటర్వ్యూల ద్వారా ప్రవేశం కల్పించే ప్రక్రియను రద్దు చేసే నిర్ణయాన్ని వ్యతిరేకిస్తూ పుణేలోని ఓ పాఠశాల హైకోర్టును ఆశ్రయించగా ఆ పిటిషన్‌ను కొట్టేసింది. అంతేగాక విద్యార్థి తల్లిదండ్రులనూ ఇంటర్వ్యూ చేయరాదని తీర్పులో స్పష్టంగా పేర్కొంది. పాఠశాల నియమావళి ప్రకారం.. 2012-13 విద్యా సంవత్సరం కోసం విద్యార్థికి ప్రవేశం కల్పిస్తూ రెండుసార్లు ఇంటర్వ్యూలు తీసుకుంది. అంగన్‌వాడీ నుంచి మొదటి తరగతి వరకు ప్రవేశం కోసం ఇంటర్వ్యూలు తీసుకోరాదని నిబంధనలో ఉందని, ఆ తర్వాతి తరగతులకు నియమావళి వర్తించదని పాఠశాల తరఫు న్యాయవాది వాదించారు. అయితే న్యాయస్థానం ఆ వాదనలను తోసిపుచ్చింది. విద్యాహక్కు చట్టం ఆధారంగా ప్రవేశాలు కల్పించాలని ఆదేశించే అధికారం తమకు ఉందని న్యాయస్థానం వెల్లడించింది.

 
Comments Off on పాఠశాల విద్యార్థుల ప్రవేశాలకు ఇంటర్వ్యూలొద్దు

Posted by on October 22, 2013 in Uncategorized

 

Comments are closed.

 
%d bloggers like this: