RSS

దేశంలో 278 కొత్త విశ్వవిద్యాలయాలు

25 Nov

దేశంలో 278 కొత్త విశ్వవిద్యాలయాలు

* రూ.22,500 కోట్లు కేటాయిస్తాం
* కేంద్ర హెచ్ఆర్‌డీ శాఖ మంత్రి పళ్లంరాజు
బెంగళూరు: దేశంలో 278 కొత్త విశ్వవిద్యాలయాలు, 388 కళాశాలలు ఏర్పాటు చేసేందుకు కేంద్ర ప్రభుత్వం యోచిస్తోంది. దీనికోసం రూ.22,500 కోట్లు ఖర్చు చేయనున్నట్లు కేంద్ర మానవవనరుల అభివృద్ధి శాఖ మంత్రి పళ్లంరాజు తెలిపారు. రాష్ట్రాల స్థాయిలో ఉన్నత విద్య అభివృద్ధికి ఈ నిధులు వెచ్చిస్తారని ఆయన పేర్కొన్నారు. రాష్ట్రీయ ఉచ్ఛతార్ శిక్ష అభియాన్ (ఆర్‌యూఎస్ఏ)పై నవంబరు 25న ఇక్కడ ఉన్నత విద్యాశాఖ మంత్రులతో అఖిల భారత సదస్సు నిర్వహించారు. ఈ సందర్భంగా మంత్రి పళ్లంరాజు, మానవవనరుల అభివృద్ధి మంత్రిత్వ శాఖలోని ఉన్నత విద్య కార్యదర్శి అశోక్ ఠాకూర్ మాట్లాడారు. విశ్వవిద్యాలయాలు, కళాశాలలకు సరైన గుర్తింపు విధానం, విద్యా ట్రైబ్యునళ్ల ద్వారా వివాదాల పరిష్కారం, అవకతవకల నిరోధం, ఉన్నత విద్య, అధ్యయనంపై జాతీయ కమిషన్ ఏర్పాటు లాంటి పలు సంస్కరణలకు ప్రణాళికలు రూపొందిస్తున్నట్లు మంత్రి పళ్లంరాజు తెలిపారు. 306 విశ్వవిద్యాలయాలు, 8,500 కళాశాలలు ఆర్‌యూఎస్ఏ ప్రయోజనాలు పొందుతున్నట్లు ఆయన చెప్పారు. ఏమాత్రం విద్యారంగ నేపథ్యం లేనివారు ప్రైవేటు విశ్వవిద్యాలయాలు స్థాపించేలా రాష్ట్రాలు ప్రోత్సహించొద్దని అశోక్ ఠాకూర్ హెచ్చరించారు. దానికి బదులు మంచి పనితీరు కనబరిచే స్వయంప్రతిపత్తి కళశాలలు, సంస్థలను విశ్వవిద్యాలయాలుగా రూపుదాల్చే దిశగా ప్రోత్సహించాలన్నారు. ప్రస్తుతం ఒక్కో విశ్వవిద్యాలయం పరిధిలో సుమారు 300 కళాశాలలు ఉంటుండటంతో పాలన వ్యవహారాల పర్యవేక్షణకే సమయం సరిపోతుందని… పరిశోధనలు, నాణ్యమైన విద్య అందించలేకపోతున్నారన్నారు. విశ్వవిద్యాలయం పరిధిలో వందకు మించి కళాశాలలు లేకుండా చర్యలు తీసుకుంటామన్నారు.

 
Comments Off on దేశంలో 278 కొత్త విశ్వవిద్యాలయాలు

Posted by on November 25, 2013 in Uncategorized

 

Comments are closed.

 
%d bloggers like this: