RSS

చదువుతో పాటు సమాజాన్ని అధ్యయనం చేయాలి

04 Dec

* డాక్టర్‌ జయప్రకాష్‌ నారాయణ
* ఉత్సాహంగా ఎన్నారై వైద్య కళాశాల వార్షికోత్సవం
చినకాకాని (గ్రామీణ మంగళగిరి), న్యూస్‌టుడే: చదువుతోపాటు సమాజాన్ని కూడా వైద్య విద్యార్థులు అధ్యయనం చేయాలని లోక్‌సత్తా పార్టీ వ్యవస్థాపకులు డాక్టర్‌ జయప్రకాష్‌ నారాయణ పేర్కొన్నారు. మండలంలోని చినకాకాని ఎన్నారై వైద్య కళాశాల వార్షికోత్సవం డిసెంబ‌రు 3న‌ రాత్రి నిర్వహించారు. ఈ సందర్భంగా జరిగిన సభకు కళాశాల ప్రిన్సిపల్‌ డాక్టర్‌ ఎన్‌.వి.ఎస్‌. చౌదరి అధ్యక్షత వహించారు. ముఖ్యఅతిథి డాక్టర్‌ జయప్రకాష్‌ నారాయణ ప్రసంగిస్తూ మంచి విద్యా సంస్థను ఏర్పాటు చేసిన ఎన్నారై అకాడమీ ఆఫ్‌ సైన్సెస్‌ ప్రవాస భారతీయ వైద్యులను అభినందిస్తున్నట్లు చెప్పారు. మంచి వైద్య కళాశాలగా ఎన్నారై గుర్తింపు పొందిందని తెలిపారు. గతంతో పోలిస్తే ఇప్పుడు సాంకేతిక పరిజ్ఞానం చాలా అందుబాటులోకి వచ్చిందన్నారు. టీవీ, ఫోన్‌ కూడా సరిగా లేని రోజుల్లో తాము చదువుకున్నామని తెలిపారు. ఇప్పుడు విద్యార్థులకు ఆ ఇబ్బందులు లేవన్నారు. ఏ విషయమైనా క్షణాల్లో శోధించి తెలుసుకునే అవకాశం ఉందని చెప్పారు. ఈ అవకాశం సద్వినియోగం చేసుకోవాలని సూచించారు. బట్టీ పట్టడాన్ని పక్కనబెట్టాలన్నారు. అధ్యయనం ద్వారా జ్ఞానం పెంచుకోవాలని సూచించారు. ఏటా ఇంజినీర్లు 2 లక్షల మంది బయటకు వచ్చినా వారిలో 15 వేల మందికి మాత్రమే ఉద్యోగావకాశాలు వస్తున్నాయని తెలిపారు. దీనికి నైపుణ్యత కోరతే కారణమన్నారు. వైద్య విద్య కేవలం పుస్తకాల్లో చదివేది కాదని అన్నారు. నిరంతరం అధ్యయనం అవసరమన్నారు. యంత్రాలను ఎక్కువగా వినియోగించకుండా జబ్బులను గుర్తించే స్థాయిలో వైద్యులు నైపుణ్య సామర్ధ్యాలు పెంచుకోవాలని సూచించారు. లండన్‌ నగరంలో 75 ఎమ్మారై యంత్రాలు ఉన్నాయని తెలిపారు. ప్రస్తుతం హైదరాబాద్‌ నగరంలో కూడా 72 వరకూ ఎమ్మారై యంత్రాలు ఉన్నాయని చెప్పారు. ప్రజల ఆరోగ్యం క్షీణించినప్పుడే వైద్యుల పని మొదలవుతుంది. కానీ ప్రజారోగ్యం బావుండాలని వైద్యులు కోరుకోవాలని చెప్పారు. ఆరోగ్య రక్షణ వ్యయం క్రమంగా పెరుగుతోందని తెలిపారు. ఇది మంచి పరిణామం కాదన్నారు. 40 ఏళ్ళ క్రితం వైద్యులను దేవుళ్లుగా రోగులు ఆరాధించేవారని, గౌరవించేవారని చెప్పారు. కానీ ఈ రోజుల్లో వైద్యులకు ఆ గౌరవం లేదని చెప్పారు. మంచి నైపుణ్యం పొందినా, ఎన్ని కోట్లు సంపాదించినా చుట్టూ పరిసరాల ప్రభావం కూడా విద్యార్థులపై ఉంటుందని చెప్పారు. కేవలం తాను ఒక్కడినే అభివృద్ధి చెందాలని కాకుండా తనతో పాటు సమాజాన్నీ అభివృద్ధి చేస్తాననే సంకల్పం ఉండాలన్నారు. ప్రభుత్వాలతో సంబంధం లేకుండా తక్కువ ఖర్చుతో మెరుగైన వైద్య సేవలను రోగులకు అందించాలని సూచించారు.

Advertisements
 
Comments Off on చదువుతో పాటు సమాజాన్ని అధ్యయనం చేయాలి

Posted by on December 4, 2013 in Uncategorized

 

Comments are closed.

 
%d bloggers like this: