RSS

మన గణిత గతం ఎంతో ఘనం

13 Jan

* డీఆర్‌డీవో అధిపతి అవినాశ్‌ చందర్‌
ఈనాడు, హైదరాబాద్‌: పూర్వం గణిత, ఖగోళ శాస్త్రాల్లో ప్రపంచానికి మన దేశం ఎన్నో ఆవిష్కరణలు అందించిందని రక్షణ పరిశోధన, అభివృద్ధి సంస్థ (డీఆర్‌డీవో) అధిపతి అవినాశ్‌ చందర్‌ పేర్కొన్నారు. డీఆర్‌డీవో ఏఎస్‌ఎల్‌లో ఫైనాన్స్‌ డైరెక్టర్‌గా పనిచేస్తున్న వేద్‌వీర్‌ ఆర్య రచించిన ‘గణిత, ఖగోళ శాస్త్రాలు-భారత్‌ భాగస్వామ్యం’ పుస్తకాన్ని జనవరి 12న ఆయన హైదరాబాద్‌లో ఆవిష్కరించారు. ఈ సందర్భంగా అవినాశ్‌ మాట్లాడుతూ.. ”పూర్వం మనదేశం గొప్పదని వేదాలు చెబుతున్నాయని అంటున్నాం. ఏం గొప్పదని అంటే.. చెప్పలేని స్థితిలో ఉన్నాం. గణిత, ఖగోళ శాస్త్రాల్లో ఎన్నో కొత్త ఆవిష్కరణలను భారత్‌ అందించిందనేందుకు ఈ పుస్తకమే ఆధారం. భవిష్యత్తులో దేశానికి ఇది గొప్ప సంపదవుతుంది” అని చెప్పారు. బిర్లా సైన్స్‌ కేంద్రం డైరెక్టర్‌ బి.జి.సిద్ధార్థ మాట్లాడుతూ.. భారత చరిత్రను విదేశీయులు రాయడం వల్ల చాలా విషయాలు తెలియకుండా పోయాయన్నారు. ఖగోళ, గణిత రంగాల్లోనే కాదు శాస్త్ర, సాంకేతిక రంగాల్లోనూ విదేశాల కంటే మనదేశమే ముందుండేదని చెప్పారు. మన దేశ గొప్పదనం వేదాల్లో ఉన్నా అది అర్థం కాని కారణంగా అర్థమయ్యేరీతిలో శాస్త్రీయ పరిశోధన ఆధారంగా రాసిన ఈ పుస్తకం సమాజానికి గొప్ప బహుమతి అని చెప్పారు. కార్యక్రమంలో రచయిత వేద్‌వీర్‌ ఆర్య, డీఆర్‌డీవో చీఫ్‌ కంట్రోలర్‌(ఆర్‌ అండ్‌ డీ) వి.జి.శేఖరన్‌ తదితరులు పాల్గొన్నారు.

Advertisements
 
Comments Off on మన గణిత గతం ఎంతో ఘనం

Posted by on January 13, 2014 in Uncategorized

 

Comments are closed.

 
%d bloggers like this: