RSS

20 లక్షల కొత్త ఉద్యోగాలు !

10 Feb

బ్యాంకింగ్‌ విస్తరణే నేపథ్యం..
*  మానవ వనరుల సంస్థల అంచనా
న్యూఢిల్లీ: వచ్చే 5- 10 ఏళ్లలో బ్యాంకింగ్‌ రంగంలో 20 లక్షల కొత్త ఉద్యోగాలు పుట్టుకువచ్చే అవకాశం ఉంది. కొత్తగా బ్యాంకింగ్‌ లైసెన్సుల జారీకి తోడు గ్రామీణ ప్రాంతాల్లో ఆర్థిక సేవల విస్తరణకు రిజర్వు బ్యాంకు, ప్రభుత్వం కలసి పలు చర్యలు తీసుకుంటుండడమే దీనికి నేపథ్యమని నిపుణులు అంటున్నారు. రాబోయే కొన్నేళ్లలో సగానికి పైగా ప్రభుత్వ రంగ బ్యాంకుల సిబ్బంది పదవీవిరమణ చేయనున్నారు కూడా. ఫలితంగా నూతన నౌకరీల సంఖ్య పెరిగే వీలుందని మార్కెట్‌ వర్గాలు చెబుతున్నాయి. మానవ వనరుల సేవల దిగ్గజం రాండ్‌స్టడ్‌ ఇండియా అంచనాల ప్రకారం.. వచ్చే పదేళ్లలో బ్యాంకింగ్‌ రంగం 7లక్షల నుంచి 10 లక్షల కొత్త కొలువులను సృష్టింవచ్చు. 2014లో అత్యధికంగా ఉద్యోగాలను సృష్టించే రంగం బ్యాంకింగేనని చెబుతోంది. మరో పక్క, మణిపాల్‌ అకాడమీ అయితే బ్యాంకింగ్‌ రంగంలో వచ్చే అయిదేళ్లలో 18-20 లక్షల ఉద్యోగాలు రావొచ్చని అంచనా వేస్తోంది. నేరు నియామకాలకు తోడు బ్యాంకింగ్‌కు మద్దతునిచ్చే వివిధ రంగాల్లోనూ ఉద్యోగ సృష్టికి అవకాశం ఉందని నిపుణులు చెబుతున్నారు.
‘ఇప్పటి వరకూ బ్యాంకింగ్‌ సేవలు అందని గ్రామీణ ప్రాంతాలపై దిగ్గజ బ్యాంకులు కన్నేస్తున్నాయి. తద్వారా వృద్ధి, లాభదాయకతను పెంచుకోవాలని ఆశిస్తున్నాయ’ని రాండ్‌స్టడ్‌ ఇండియా అంటోంది. ‘వచ్చే కొన్నేళ్లలో బ్యాంకింగ్‌లో నియామకాలు పెరగవచ్చని.. కొత్త బ్యాంకుల రాకతో పాటు సగానికి పైగా సిబ్బంది పదవీవిరమణ చేస్తుండడం కలిసివచ్చే అంశమ’ని మెరిట్‌ట్రాక్‌ సర్వీసెస్‌ చెబుతోంది.

 
Comments Off on 20 లక్షల కొత్త ఉద్యోగాలు !

Posted by on February 10, 2014 in Uncategorized

 

Comments are closed.

 
%d bloggers like this: