RSS

సెంట్రల్ వర్సిటీగా మార్చండి!

10 May

సెంట్రల్ వర్సిటీగా మార్చండి!
* తెలుగు విశ్వవిద్యాలయ అధికారుల ప్రతిపాదన
ఈనాడు, హైదరాబాద్:
పొట్టి శ్రీరాములు తెలుగు విశ్వవిద్యాలయాన్ని కేంద్రీయ విశ్వవిద్యాలయంగా మార్చాలని వర్సిటీ అధికారులు రాష్ట్ర ప్రభుత్వానికి ప్రతిపాదించారు. తెలుగు విశ్వవిద్యాలయంతో పాటు మొత్తం ఆరు విశ్వవిద్యాలయాలను పునర్విజభన బిల్లులోని పదో షెడ్యూల్‌లో చేర్చిన సంగతి తెలిసిందే. అంటే ఇవి ఏడాది పాటు ఉమ్మడిగా పనిచేస్తాయన్నమాట. ఈ క్రమంలోనే రాష్ట్ర ప్రభుత్వం ఆయా విశ్వవిద్యాలయాల ఆస్తులు, సిబ్బంది, నిధులు తదితర వివరాలను కోరింది. దీనికోసం ప్రత్యేక ప్రశ్నావళిని కూడా పంపించింది. ఇందులో విశ్వవిద్యాలయం అభివృద్ధిపై సూచనలనూ ఆహ్వానించింది. దీనికి స్పందించిన తెలుగు విశ్వవిద్యాలయం అధికారులు… ప్రపంచవ్యాప్తంగా సుమారు 14 కోట్ల మంది తెలుగువారున్నారని, వారందరి కోసం విశ్వవిద్యాలయం మరింత అభివృద్ధి సాధించేందుకు దీన్ని కేంద్రీయ విశ్వవిద్యాలయంగా మార్చాలని ప్రతిపాదించారు. ఉర్దూ, హిందీ, ఆంగ్లం-విదేశీ భాషలకు కేంద్రీయ విశ్వవిద్యాలయాలున్నాయని గుర్తుచేశారు. తమ ప్రతిపాదనపై ఉపకులపతి ఆచార్య ఎల్లూరి శివారెడ్డి మాట్లాడుతూ.. దీనిపై గవర్నర్‌ను కూడా కలవాలని యోచిస్తున్నామని చెప్పారు. తెలుగు విశ్వవిద్యాలయాన్ని ప్రస్తుతం ఉమ్మడి జాబితాలో చేర్చినా.. రెండు రాష్ట్రాల ముఖ్యమంత్రులు చర్చించి తుది నిర్ణయం తీసుకుంటారన్నారు.

 
Comments Off on సెంట్రల్ వర్సిటీగా మార్చండి!

Posted by on May 10, 2014 in Uncategorized

 

Comments are closed.

 
%d bloggers like this: